وبلىستا قالايى وندىرەتىن ۇلكەن كەن ورنى اشىلىپ, ءوڭىر ەكونوميكاسىنا سەرپىن بەرەدى دەپ كۇتىلۋدە.
«كوپ جىلدار بويى قازاقستاندا ازىرگە بالاماسى جوق, ال ورتالىق ازياداعى ءىرى قالايى كەن ورنى ايىرتاۋ اۋدانى سىرىمبەت ەلدى مەكەنى ماڭىندا ورنالاسقان. بيىل 4 ميلليارد تەڭگە كولەمىندە ينۆەستيتسيا قۇيىلادى. جوبا 2021 جىلعا تامان تولىق كۇشىنە ەنەدى. سول كەزدە جالپى ينۆەستيتسيا كولەمى 100 ميلليارد تەڭگەگە جەتەدى», دەدى قۇمار اقساقالوۆ.
زاۋىتتاردى جاڭعىرتۋدىڭ ناتيجەسىندە قازاقستاندا شىعارىلمايتىن ونىمدەر وڭىردە وندىرىلە باستادى. تۇرمىستىق تەحنيكاعا ارنالعان قۇرىلعىلار, اقپاراتتىق قاۋىپسىزدىك قوندىرعىلارى شىعارىلادى. زاۋىتتاردىڭ تولىققاندى جۇمىس ىستەۋى الداعى 3 جىلدا ءونىم كولەمىن 40 پروتسەنتكە وسىرۋگە مۇمكىندىك بەرەدى.
ون جىلعا جۋىق توقتاپ تۇرعان «بيوحيم» كاسىپورنى «بيووپەرەيشن» دەگەن اتپەن قايتادان ىسكە قوسىلىپ, كراحمال مەن كىلەگەيدى شەتەلگە جونەلتۋدى باستاپ كەتتى. جىل اياعىنا قاراي بيوەتانول شىعاراتىن تسەح بوي كوتەرەدى. قايتالاما پوليمەر وڭدەيتىن بىرەگەي زاۋىت اشىلدى.
شەتەلدىك ينۆەستورلاردىڭ قاتىسۋىمەن جەم جانە اعاش وندىرەتىن, بيداي وڭدەيتىن كاسىپورىندار سالۋ جوسپارلانعان. زاماناۋي داتا-ورتالىقتى تۇرعىزۋعا 27 ميلليارد تەڭگە ينۆەستيتسيا تارتىلعان. الداعى ەكى جىلدا ءوڭىر ەكونوميكاسىنا 80 ميلليارد تەڭگە ينۆەستيتسيا قۇيىلىپ, 1500 ادام تۇراقتى جۇمىسپەن قامتىلادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
